E teta e finales së këtij kompeticioni do ta hapë perden sonte me katër ndeshjet e para të saj.

Gjigantët e futbollit evropian si Barcelona, Bayern Munich dhe Liverpool do të zbresin sonte në fushën e blertë në tentimin e tyre për të kaluar në çerekfinale të kësaj gare.

Pa diskutim, dueli i natës do të jetë ai mes Newcastle United dhe Barcelonës, shkruan Express, transmeton Periskopi.

Ekipi anglez do të rikthehet në skenën e madhe evropiane, në tentim për ta bërë mrekullinë.

Nga ana tjetër, gjiganti katalunas është i vetëdijshëm se s’do të ketë punë të lehtë, por pa diskutim se do ta synojë fazën tjetër.

Trajneri Hansi Flick do të përballet me disa mungesa, por tashmë e ka në mendje ekipin që do ta vendosë në fushë për t’u përballur me anglezët.

Bayerni ndërkohë do ta vizitojë Atalantën e Berat Gjimshitit.

Italianët janë mjaft të fortë dhe të papërshtatshëm në shtëpi.

Mirëpo, bavarezët janë prej favoritëve për ta fituar trofeun këtë sezon dhe për këtë, sonte shkojnë për ta
“pushtuar” Italinë.

Paraprakisht, sonte do të luhet një sfidë e zjarrtë, të paktën për nga atmosfera, mes Galatasarayt dhe Liverpoolit.

Tifozët turq dinë të bëjnë atmosferë elektrizuese, bashkë me ata anglezë, prandaj edhe në fushën e blertë pritet një duel fantastik.

E përballja e katërt sonte do të jetë ajo mes Atletico Madridit dhe Tottenhamit.

“Los Colchoneros” shihen favoritë ndaj Spurs, të cilët po kalojnë nëpër një krizë dhe një sezon për t’u harruar.

Tri prej ndeshjeve të sontme do të nisin prej orës 21:00 dhe një tjetër prej 18:45.