Sipas mediave bullgare, njëra ofertë vjen nga MLS (SHBA), ndërsa tjetra nga Turqia. Realisht opsionet nga Turqia janë Rizespori që luan në elitë dhe Amedspor, skuadër që aktualisht renditet e treta dhe ka gjasa të ngjitet në Superligën turke.

Po ashtu, raportohet edhe për interesim nga një klub rus, por Dellova posedon vetëm pasaportë të Kosovës, që e vështirëson kalimin e tij atje.

Dellova, aktualisht 27 vjeç, ka kontratë me CSKA-në deri më 30 qershor 2027, ndërsa marrëveshja përfshin një klauzolë lirimi prej 900 mijë eurosh.

Në dimër, klubi saudit Al Najma kishte qenë i gatshëm të paguante shumën e klauzolës dhe i kishte ofruar qendërmbrojtësit një pagë shumë të lartë.

Megjithatë, Dellova e refuzoi ofertën, pavarësisht se në atë periudhë kishte pasur edhe tensione me klubin, deri në atë pikë sa raportohej se kishte refuzuar të stërvitej me CSKA-në. Më pas, ai qëndroi te skuadra nga Sofja, raporton Telegrafi, transmeton Periskopi.

Rreth dy muaj më parë, sipas raportimeve, kanë nisur bisedimet për një kontratë të re me CSKA-në, ku klauzola e lirimit nuk do të përfshihej dhe Dellova do të përfitonte pagë më të lartë. Deri tani, nuk ka marrëveshje.