Gjatë një paneli diskutimi në Samitin e Diasporës në Tiranë, ku morën pjesë edhe kryediplomatët e Kosovës dhe Shqipërisë, Ahmeti tha se gjuhës shqipe “duhet t’i dalim zot të gjithë”.

“Sa i takon gjuhës shqipe në Maqedoni, është një rrezik i vërtetë që mendoj që duhet t’i dalim zot të gjithë gjuhës që e flasim të gjithë”, tha ai.

Ahmeti tha se “gjuha shqipe në Maqedoni, me marrëveshje ndërkombëtare, të nënshkruar dhe të garantuar nga Shtetet e Bashkuara të Amerikës me garantues të dërguarin e George Bushit, president i asaj kohe”.

Ai tha se garantuese e asaj marrëveshjeje është edhe NATO.

Ahmeti tha se është e përbashkët përgjegjësia për ta mbrojtur Marrëveshjen e Ohrit të gushtit të vitit 2001 që i dha fund luftës në Maqedoninë e Veriut. Ajo marrëveshje siguroi, ndër tjerash, që shqipja të bëhej gjuhë zyrtare dhe të rritej pjesëmarrja e shqiptarëve në institucionet qeveritare, polici e ushtri.

“Përgjegjësinë e kemi të përbashkët: Washington, Bruksel, NATO, forcat politike shqiptare, forcat politike maqedone. Maqedonia ka ardhmëri në bashkjetetsë, në bashkqeverisje vetëm me shqiptarët. Pa shqiptarët, Maqedonia nuk mund të mbijetojë dhe ditët i ka të numëruara”, tha Ahmeti.