Hulumtimi, i udhëhequr nga Duke Health në bashkëpunim me Universitetin e Minesotës, identifikoi se molekulat shumë të vogla të ARN-së në gjak, të njohura si piRNA, janë tregues më të fortë të mbijetesës afatshkurtër sesa mosha, kolesteroli apo faktorët e stilit të jetesës.

Studiuesit analizuan mostrat e gjakut të më shumë se 1,200 personave mbi moshën 71 vjeç dhe zbuluan se nivelet më të ulëta të disa piRNA-ve lidhen me mbijetesë më të gjatë. Me ndihmën e inteligjencës artificiale dhe mësimit makinerik, ata vlerësuan 187 tregues shëndetësorë dhe 828 molekula të vogla ARN.

Rezultatet treguan se vetëm gjashtë piRNA mund të parashikojnë mbijetesën dyvjeçare me saktësi deri në 86%. Për më tepër, këta biomarkues rezultuan më të fuqishëm se mosha, aktiviteti fizik, kolesteroli dhe mbi 180 matje të tjera klinike.

Autorja e studimit, Virginia Byers Kraus, tha se ishte befasuese që një sinjal kaq i fortë për mbijetesën vinte nga një test i thjeshtë gjaku. Sipas saj, nivelet e larta të disa piRNA-ve mund të tregojnë se diçka në organizëm nuk po funksionon siç duhet.

Ekipi kërkimor planifikon tani të hetojë nëse trajtimet, ndryshimet në stilin e jetesës apo medikamentet mund të ndikojnë në nivelet e këtyre molekulave.

Studiuesit theksojnë se, megjithëse rezultatet janë premtuese, nevojiten studime të tjera përpara se testi të përdoret gjerësisht në praktikën klinike./Periskopi/