Presidentja e Kosovës, Vjosa Osmani, ka filluar veprimet për të përgatitur KQZ-në për zgjedhjet e reja. Përmes një shkrese, ajo ka kërkuar nga partitë politike që t`i propozojnë emrat për anëtarë të rinj në Komisionin Qendror të Zgjedhjeve.

Burimet e Nacionales kanë bërë me dije se shefja e shtetit një shkresë të tillë ia ka nisur dje LVV-së, PDK-së, LDK-së, AAK-së, Listës Serbe dhe partive të komuniteteve tjera, transmeton Periskopi.

I njëjti burim ka treguar se në këtë shkresë presidentja Osmani ka kërkuar nga partitë politike propozimet e tyre të dërgohen në Presidencë brenda afateve ligjore.

Mandati i anëtarëve të Komisionit Qendror të Zgjedhjeve është i lidhur me certifikimin e rezultatit të zgjedhjeve për Kuvendin e Kosovës.

Ligji për Zgjedhjet e Përgjithshme në Kosovë tregon se shefja e shtetit është e obliguar që jo më vonë se 30 ditë pas certifikimit të zgjedhjeve për Kuvend të ua kërkojë grupeve parlamentare propozimet për anëtarë të KQZ-së.

Në nenin 61 të këtij ligji, ku flitet për mandatin dhe emërimin e anëtarëve të KQZ-së, jepen detaje për këtë çështje.

“Presidenti i Republikës së Kosovës, bazuar në rezultatet që kanë dalur nga zgjedhjet e përgjithshme, jo më vonë se 30 ditë pas certifikimit të zgjedhjeve për Kuvend, u kërkon grupeve parlamentare/subjekteve politike që të propozojnë me shkrim kandidatët për anëtar të KQZ”, thuhet në paragrafin 6 të këtij neni.

Më tej, në këtë nen tregohet se brenda çfarë periudhe kohore partitë politike duhet t`i përgjigjen presidentes Osmani.

“Grupet parlamentare/subjektet politike brenda afatit prej shtatë (7) ditësh i dërgojnë propozimet e tyre dhe emërimi nga Presidenti bëhet brenda pesë (5) ditësh nga dërgimi i propozimeve”, thuhet në këtë paragraf.

Ditë më parë edhe Demokracia në Veprim (DnV) i ka kërkuar presidentes që ët veprojë më shpejt në këtë drejtim.

Përmes një komunikate për medie, DnV u ka bërë thirrje presidentes Osmani dhe partive politike që të përmbyllin pa vonesë procesin e nominimit dhe emërimit të anëtarëve të rinj të KQZ-së.

“Legjislacioni zgjedhor përcakton që, pas certifikimit të rezultateve, Presidentja i kërkon subjekteve parlamentare nominimet për anëtarët e KQZ-së, ndërsa këto të fundit kanë një afat të caktuar për dorëzimin e propozimeve, pas së cilës Presidentja bën emërimin e tyre. Në këtë moment, kur vendi po përballet me zhvillime që pritet të çojnë drejt një procesi të ri zgjedhor dhe kur 11 marsi – si afat ligjor për këtë procedurë është drejt përfundimit – përmbyllja e procesit të emërimit të përbërjes së re të KQZ-së bëhet edhe më e rëndësishme. Kjo sidomos për shkak se legjislacioni aktual nuk parasheh më vazhdimin automatik të mandatit të përbërjes ekzistuese të KQZ-së deri në emërimin e së resë – në rast të zgjedhjeve – siç ishte rregulluar me ligjin e mëparshëm”, është thënë në komunikatën e DnV-së.

Mandati i anëtarëve të KQZ-së është i lidhur me mandatin e ciklit zgjedhor dhe në parim fillon jo më vonë se gjashtëdhjetë (60) ditë pas certifikimit të rezultateve të zgjedhjeve për Kuvend.

Fillimi i mandatit sipas këtij paragrafi, nënkupton përfundimin e mandatit paraprak.

KQZ-ja ka 11 anëtarë. Aktualisht LV-ja përfaqësohet nga dy anëtarë(Sami Kurteshi, Alban Krasniqi). Edhe PDK-ja në këtë mandat përfaqësohet me anëtarë (Arianit Elshani dhe Ilir Gashi). Nga një anëtar kanë LDK-ja(Sami Hamiti) dhe AAK-j(Muharrem Nitaj).

Ndërsa pesë përfaqësuesit tjerë iu takojnë partive nga komunitet.

Komisioni Qendror i Zgjedhjeve rezultatin e zgjedhjeve të 9 shkurtit e ka certifikuar më 27 mars.