Robert Duvall, i cili luajti në “The Godfather” dhe “Apocalypse Now”, ka vdekur në moshën 95-vjeçare, sipas raportimeve të mediave amerikane.

Fituesi i çmimit “Oscar” vdiq “në paqe” në shtëpinë e tij në Middleburg, Virxhinia, të dielën, sipas një deklarate të dërguar nga agjencia e tij e marrëdhënieve me publikun në emër të bashkëshortes së tij, Luciana.

“Në sytë e botës, ai ishte një aktor fitues i çmimit Oscar, një regjisor, një rrëfimtar. Për mua, ai ishte thjesht gjithçka,” tha ajo në deklaratë.  “Për secilin nga rolet e tij të shumta, Bobi dha gjithçka për personazhet dhe për të vërtetën e shpirtit njerëzor që ata përfaqësonin. Duke bërë këtë, ai na lë të gjithëve diçka të qëndrueshme dhe të paharrueshme. Faleminderit për mbështetjen që i dhatë Bobit dhe që na dhatë këtë kohë dhe privatësi për të përkujtuar kujtimet që ai lë pas”.

Duvall ishte i njohur për role të shumta “të forta” gjatë një karriere mbresëlënëse gjashtëdekadëshe, si këshilltari i mafias në “The Godfather” dhe oficeri autoritar i ushtrisë në “Apocalypse Now”.

Ai pati vetëm disa minuta kohë në ekran, por replika e tij e famshme në klasikun e vitit 1979 të Francis Ford Coppolas, “I love the smell of napalm in the morning” (“E dua aromën e napalmit në mëngjes”), u bë legjendare.

I nominuar për gjashtë çmime Oscar, Duvall fitoi çmimin për aktorin më të mirë në vitin 1983 për interpretimin e një këngëtari country në “Tender Mercies”. /Periskopi/