Letnicë, 29 prill 2026

Shkruan: Albert Gjoni

Një pelegrine nga Gjermania ka përshkuar mbi 1600 kilometra me biçikletë për të arritur në Letnicë, duke e kthyer këtë rrugëtim në një dëshmi të rrallë të besimit, përkushtimit dhe qëndrueshmërisë shpirtërore.

Susane Do, e nisur nga Kirchdorf im Wald, udhëtoi për 25 ditë rresht përmes disa shteteve evropiane, me një qëllim të vetëm: të arrijë në Letnicë, vend i njohur për traditën e pelegrinazhit dhe lidhjen e tij me figurën e Shën Nënës Terezë.

Intervista është realizuar më 23 korrik 2025 në Letnicë.

Ky udhëtim nuk ishte vetëm fizik. Sipas saj, ishte një përjetim i thellë shpirtëror.

“Doja të bëja një pelegrinazh në Kosovë dhe kërkova një vend të tillë. Letnica më tërhoqi menjëherë, edhe për shkak të lidhjes me Shën Nënë Terezën,” tregon ajo.

Ajo nuk është e panjohur me udhëtime të tilla. Në vitet e fundit, ka realizuar pelegrinazhe të ngjashme me biçikletë në vende të ndryshme si Fatima, Medjugorje dhe Jerusalem. Megjithatë, kjo ishte hera e parë që vizitonte Kosovën.

Rrugëtimi i saj nuk ka qenë i lehtë. Ajo përshkruan sfida të shumta, nga temperatura të larta dhe stuhi, deri te defekte teknike në biçikletë. Megjithatë, çdo vështirësi, sipas saj, ishte pjesë e një përvoje më të madhe.

“𝐊𝐚 𝐩𝐚𝐬𝐮𝐫 𝐬𝐡𝐮𝐦𝐞̈ 𝐦𝐨𝐦𝐞𝐧𝐭𝐞 𝐤𝐮𝐫 𝐤𝐚𝐦 𝐧𝐝𝐢𝐞𝐫 𝐧𝐣𝐞̈ 𝐮𝐝𝐡𝐞̈𝐡𝐞𝐪𝐣𝐞 𝐭𝐞̈ 𝐛𝐫𝐞𝐧𝐝𝐬𝐡𝐦𝐞, 𝐬𝐢𝐤𝐮𝐫 𝐜̧𝐝𝐨 𝐠𝐣𝐞̈ 𝐩𝐨 𝐬𝐡𝐤𝐨𝐧𝐭𝐞 𝐝𝐫𝐞𝐣𝐭 𝐧𝐣𝐞̈ 𝐪𝐞̈𝐥𝐥𝐢𝐦𝐢 𝐭𝐞̈ 𝐜𝐚𝐤𝐭𝐮𝐚𝐫,” 𝐬𝐡𝐩𝐫𝐞𝐡𝐞𝐭 𝐚𝐣𝐨.

Momenti i mbërritjes në Letnicë ishte i pazakontë. Zona përreth ishte përfshirë nga një zjarr në pyll, çka e bëri përvojën edhe më dramatike.

“Isha e lumtur që arrita, por në të njëjtën kohë nuk dija çfarë po ndodhte përreth. Ishte një ndjenjë e përzier,” kujton ajo.

Pavarësisht kësaj, përvoja e saj në Letnicë u shndërrua shpejt në një kujtim pozitiv, falë mikpritjes së njerëzve dhe atmosferës së vendit.

“Kam pasur vetëm takime pozitive. Njerëzit këtu janë shumë të hapur dhe të afërt. Kisha e Letnicës duket se i bashkon të gjithë,” thotë ajo.

Ajo thekson se një nga aspektet më mbresëlënëse ishte bashkëjetesa dhe respekti ndërmjet njerëzve të besimeve të ndryshme.

“Në këtë vend ndjehet një paqe e veçantë dhe një energji pozitive që reflektohet edhe te njerëzit,” shton ajo.

Për Susane Do, Letnica nuk ishte vetëm një destinacion. Ishte një përfundim i një rruge të gjatë dhe një përvojë që do të mbetet gjatë në kujtesën e saj.

Momenti i mbërritjes së saj në kishën e Letnicës është dokumentuar edhe në një fotografi, ku ajo shfaqet përpara objektit fetar pas përfundimit të udhëtimit.